Vit droyma øll um eitt enn betri samfelag, eitt samfelag sum mennist. Hetta kemur ikki av sær sjálvum. Góð leiðsla skal til. Hon er fyritreyt fyri menning og broyting.

Okkara samfelag hevur tí  tørv á góðum og ídnum leiðarum, sum tora at seta mál, hugsa nýtt og megna at motivera fólk at røkka stórum málum í felagsskapi.

Børnini hava tørv á góðum leiðarum/foreldrum, sum skapa stimbrandi og tryggar umstøður fyri menning og lívsgóðsku. Fyritøkur, fyrisiting, sjálvbodnir felagsskapir, samkomur og kirkjur hava tørv á leiðarum, sum gerast enn betri til at leiða, menna og kveikja onnur. Í okkara politisku skipan er tørvur á leiðarum, sum tora at ganga undan, hugsa øðrvísi og taka avgerðir til gagns fyri alt landið.

Tíverri er tað ov lítið fokus á leiðslu og leiðslumenning í okkara landi. Eg haldi, at vit í alt ov lítlan mun viðurkenna, at tað eru góðir leiðarar, sum er lykilin til jaligar broytingar.

Tað er ein stór og neyðug avbjóðing at menna leiðarar á øllum økjum og á øllum stigum, so at teir við góðum førleikum ganga á odda og vísa vegin til eina bjartari framtíð. Leiðsla snýr seg jú um at leiða menniskju og organisatiónir fram ímóti felags málum.

Tað er alneyðugt at leiðsla verður sett breddan í nógv størri mun.

Okkara størsti tørvur er ikki fyrst og fremst kommunmurnýskipan, pensjónsnýskipan, heilsunýskipan ella nýggj átøk á ymisku økjunum. Alt hetta er gott og neyðugt.

Men fyritreytin fyri væl eydnaðum nýskipanum og framburði hjá bæði tí almenna og privata er, at leiðarar á øllum stigum gerast enn betri til at leiða, stimbra innovatión, seta mál og røkka teimum saman við teirra starvsfólkum.

Við hesum bloggi vil eg vera við til at seta leiðslu og innovatión á breddan. Eg bloggi um leiðslu, tí eg brenni fyri leiðslu. Eg bloggi, tí eg vil luta við onnur mínar tankar um leiðslu og geva mítt íkast til leiðslutilvitan- og menning.

Eg bloggi ikki, tí at eg haldi, at eg eri fulllærdur leiðari. Eg viðurkenni, at eg havi nógv at læra og at eg áhaldandi eigi at víðka mín sjónarring.

Sum leiðarar mugu vit vera eyðmjúkir og viðurkenna, at vit hava ikki allar førleikar og at vit mugu áhaldandi menna okkum og fáa íblástur frá øðrum. Vit mugu flyta okkum og blíva betri.
Ein leiðari, sum stendur í stað, leiðir ongan. Hin góði leiðarin er tilvitaður um tørvin á sjálvsmenning og kveikjan fyri at kunna leiða og kveikja onnur.

Ímynda tær, um allir leiðarar í Føroyum settu sær hetta mál: “Eg havi sum mál ta komandi árið at gerast 5-10% betri leiðari” Hetta hevði uttan iva sett í gongd jaligar broytingar í øllum samfelagnum.

Eitt betri samfelag krevur betri leiðarar. Tí má leiðsla á breddan.